#يوميات_ابو_العيون
#محمد_السيد
الحلقة ٣
عاد ابو العيون إلى البيت بعدما رشق بذره عين دمرت مستقبله ، فتح باب الشقة ليجد عطيه في وجهه والتي صعقت عندما رأته حيث قالت : انت ايه اللي جابك بدري كده ؟
رد ابو العيون بحزن : شطبوا عليه يا عطيه .
فقالت بضيق : طب انا والعيال ذنبنا ايه .
اشتاط غيظا من كلامها فصرخ في وجهها : هو انتوا كلكم قرفانين مني ليه هو انا جربه !
فعلقت قائله : يا ريت جربه على الأقل كنا بعدنا عنك اما عينك اللي بترشق في الواحد تجيبه الأرض نعمل فيها ايه ؟
رد ابو العيون مدافعا عن نفسه : ده كلام فاضي هي في حاجه اسمها عين بتجيب الارض .
فقالت بثقه : زمان كنت بقول الكلام ده جهل وخرافات بس بعد ما اتجوزتك اتاكدت أن الكلام ده حقيقي والعينة بينه .
فقال بغضب : تصدقي انا اللي غلطان اني قاعد اتكلم مع واحده جاهله ذيك قومي يا وليه هاتي نفطر .
فردت ببرود : هو انت لسه ليك نفس تفطر .
فصرخ في وجهها : غوري هاتي الفطار ده انت وليه بومه جيبتلي الفقر .
وبعد أن رحلت عطيه من وجه ابو العين خرج فرج من غرفته ليجد أبوه أمامه فقال الطفل ببراءة : هما طردوك من الشغل يا بابا .
فرد ابو العيون قائلا : مين دول اللي طردوني ده انا هناك المدير يا فرج .
فعلق فرج قائلا : بس انا سمعت ماما وهي بتقول لابله مديحه انك شغال عبده مشاوير .
فسأله ابو العيون مستفسرا : يعني ايه عبده مشاوير ؟
فرد فرج باستهزاء : يعني تودي ملف تجيب ملف ممكن تجيب فطار للموظفين كده يعني .
فقال أبو العيون محدثا نفسه بصوت عالي : وهي عطيه عرفت اذاي ؟
فرد فرج ببراءة : هي ماما بس اللي عارفه ده ستات الحارة كلهم عارفين انك عبده مشاوير .
رفع ابو العيون يده للسماء ثم قال بنبره صادقه : منك لله يا عطيه.
إلى اللقاء في حلقة جديدة من يوميات ابو العيون
