#يوميات_ابو_العيون
#محمد_السيد
الحلقة ٤
يجلس ابو العيون على مائدة الطعام حوله أفراد اسرته زوجته عطيه وأبناؤه فرج وعوض ، ابو العيون ياكل بنهم وكذلك ابنه عوض أما الآخرين فيأكلون على مهل
صرخ ابو العيون في عوض قائلا : كفايه اكل بقى حرام عليك ده انت ناقص تاكلنا
فردت عطيه على زوجها : متسيبوا ياكل برحته مش عيل ولازم يتغذى .
صرخ ابو العيون في زوجته : اهو ده اللي انتي فالحه فيه عماله تأكلي في العيال لحد ما بقوا بغال .
عوض مشغول بالطعام غير مهتم بالدفاع عن موقفه ولهذا وكل اخوه فرج نائب عنه حيث قال بثقه لأبوه : طب ما انت بتاكل اكتر منه يا بابا ومحدش بيقولك حاجه .
اشتاط غيظ ابو العيون فصرخ فيهم قائلا : ده بيتي اكل ذي ما انا عايز وانتوا ضيوف تاكلوا برده ذي ما انا عايز .
ضحكت عطيه ثم قالت : انت محسسنا انك بتأكلنا كباب وكفته دول شويه فول وجبنه قديمة ، الموضوع مش مستاهل الفضيحة دي .
نظر ابو العيون لابنه عوض نظره حاقده فوجده مازال ياكل بنهم غير مهتم بالحرب التي تحدث حوله فصرخ فيه قائلا: انت ايه حوت مبتشبعش خلصت الأكل كله ارحمنا بقى .
وبعد أن أنهى ابو العيون جملته صرخ عوض صرخة مدويه وارتمي في الأرض ممسكا بطنه بسبب ألم شديد في معدته فقد أصيب بحاله تسمم لا احد يعرف سببها .
صرخت عطيه في زوجها : عينك هتموت العيال يا ابو العيون .
إلى اللقاء في جزء قادم مع يوميات ابو العيون
