هميت بحزني وهم بي
وانا قلبي طايش مش نبي
قلبي الغبي
خبي النهار ف خطوط ايديك
شوفتوا الهموم يا نجوم دموع المحرومين منذ الأزل
داق قلبي مر ولم يزل واقف طابور العشمانين يلمح عنيك
قلبك شريك الحلم والليل والسهر
والمشي ويا طريق طويل اشجارة توت
ازاي بيتحول غرق يرمي الملامه ع الشطوط
يا عيون بيوت ف الخمسينات
شباك عصاري تطل منه الف شمس
عطشانه ضل خطوتك لو يوم تفوت
كل الحكايه يا طيبين
انسانه خارجه م السنين بعيون بتلمع ذكريات
ونجوم من الشوق مبدورين غرقانه ف الكعب الحنان
ريحة زمان سكة سفر والصحبة قطر
وكلام ف سطر كتاب تاريخ فيه انتصار
فيه انتظار ما يسيبش ف الروح أي شق
ولمرة أولي حد يعشق لانتظار
خدت القرار
هاخدك دليل
هاخدك بديل
للنبض والليل والنهار
انت المدار لنجم تايه من زمن
وإزي ف لحظة بتبقي جرح أو مرار
ليا انا
مروة انا
مليون سنه بتوضا ليل
لجل اني امسح نقطه نور غرقانه فيك
قلبي الشريك ف الجرم دا
لبي الندا بإشارة واحده من عنيك
والمبتدا
انتي اسمك ايه
مروة انا
طب ليه كدا
ليه ما يسموكيش ندا
والورد متشوق يطوف جوا الحروف م الحرف دا للحرف دا
دي قصيدة أولها الحياه وآخرها للحب انتحار
اخرتها بار فدان خضار الشقيانين
اخرتها الوقتي انت فين
ازاي يا شمس تبخري قلب الحنين
طب كنتي بخرتي العذاب
أو الغياب
دا قلبي اول مرة داب
كنتي انتي اول خيط مطرز عشقي ليه
دلوقتي بلجا للعياط
والاحتياط من أي ليله لونها حب
وأجرى استخبي استخبي م المطب
واتغطي مزيكا وسجاير
وادفي جوه وريد يناير
ي عمر كان حلمين بشاير
وقت انسلاتي من كيانك
اول م شوفت دخلت بار
وطلبت ايه ؟
واحد لمون بردان اوي
انا أصلي واخدة ع الفراق زي النهار
و نصيبي قالي يا مروة يلا اتعودي
الحب جنه ف أوله وف آخره نار
