ولاء الدين فاروق
ممنوع من النشر
الحب بين اتنين
ميكونش ابدا مشاع
وكلام ما بين اتنين
وازاى بقا يتذاع
وزعل ما بين اتنين
ميجبش عُمره صداع
وان حد م الاتنين
حكى وصرح و ذاع
ف حكاية الاتنين
قلبت تحدى و صراع
ومين من الاتنين
هو اللى بادر و باع
مبقوش بقا اتنين
وصبحنا جوا اجتماع
والحلم بين الاتنين
تاه ف المناهدة و ضاع
.
.
.
ياللى انت داير بالخبر بتقول
شايله النفوس صندوق لكن مقفول
جواه وشوش و بيلبسوها الناس
فتلاقى منهم المعترض علطول
وتلاقى منهم صاحب الحكمة
وطالعه منه الكلمة ملضومة ف الكلمة
وكمان هناك الساكت الغيران
عايز يبان و كأنه ولا همه
ولكنه شايف ان دا همه
يقعد يفكر .. شياطينه يتلمو
ويحط خطة للخناق و البعد
فيقول كلام ويستلقى الرد
لحد ما يوصل لأبعد حد
ولسه ف الصندوق كمان أقنعه
منتظره بعض البشر
جايه و مُتسكعه
تلبس قناعها والمهمه تكون
كلمات تصيب متكونش متوقعه
.
.
.
خلى اللى بيننا بيننا اكيد افضل
علشان اكمل وارجع كمان افضل
وعشان اواجه معاك ..
دا انا معاك.. هقدر
وكل شىء مكتوب ..
يا حبيبى ..متقدر
ولاء الدين فاروق
