مسااااااء الفل
أدب ساخر
جلسا يتناوبان شد الأنفاس من الجوزة البلدى أم رفاص داير – الواد شحته معلم والجوزة فى أيدة بترقص عشرة بلدى وحلاوتة لما يسلكها ويملاها بشوية ميه ساقعة ويرص الولعة عليها وتحت الولعة التعميرة من النوع اللى بيسموة هاى بريفكس – وقول إيه الواد فتحى لمونه يروح حاضن الغابه ولازق بقه فيها وشادد على الآخر – وبالصلى ع النبى تلاقى النار قعدت تطأطأ لحد ما الدنيا تولع وما يسيبش الغابة إلا والحجر مولع نار – ويفضل يكح ويكح لحد ما دماغة تجيب الأرض وتبقى كدة التعميرة زى ما بيقولوا ضربت فى النافوخ .
دخل عليهم الواد سيدهم الحلاق ورشدى بتاع البلاط وفى إيد كل واحد منهم لفة .
بص ليهم الواد شحته وراح مناولهم الجوزة على طول وقال خد ياض بوس الحجة قبل ما تبرد – التقط سيدهم الجوزة مرددا عمى الكبير أبو الهندزة – سديكى وأنتيمى وعلى طول راح مناولة اللفة وقعد على قرافيصة وحاضن الجوزة وهات يابوس والدخان يخرج من مناخيرة بطريقة متقطعة مثل القاطرة التى تدخل محطتها وبص لرشدى بتاع البلاط وهو يخرج الكلمات من فمة بدون وعى – مش قولت ليك ياحمار الليلة هباب .
بص رشدى لشحتة وقالة – الشيشتم إيه النهاردة ياكبير ؟
رد علية شحته – صبّاحى يا أسطى جبت المونة معاك ؟
– أيوة يا كبير بس إنت عارف أنا ليّه شوية طقوس لازم أعملها .
– رد علية شحتة وهو فى غيبوبة والكلام بيطلع من بقة بالعافية : الواد مونة دة مثكف فشخ والكلام بيطلع من نخاشيشة مترتب قوى – بيفهم فى كل حاجة وهو أحسن واحد فى المنتكة دى كلها – تعرف يا توحة لما القهوة إمبارح راحت تضرب فى بعضيها علشان الواد ديزل بتاع التوكتوك مش عاوز يدفع المشاريب اللى عليه قام الواد رشدى مونة وفى ظرف ثوان حل المشكلة وخد الواد ديزل على جنب بهدوء وإتكلم معاة وفهمة غلطة وحاسبة ع المشاريب – يعنى دى بقى سياسة ولا مش سياسة ؟
– بص سيدهم لشحتة والجوزة بتطقطق فى إيدة بعد ماخلص رفرفة – صح يا كبير إمبارح بعد ما إتعشينا الواد رشدى ضرب كوباية الشاى السودة مع سيجارتين البانجو وإداها تكويعة من اللى هيه وفتحنا التليفزيون على كناة ( سوسو باى ) دى كناة محترمة جدا بتجيب فكرات حلوة بتناقش قضايا سخنة جامد تخلى الواحد يسيب اللى فى إيدة ويفضل مشدود قوى .
– ياعم دى بتجيب المذيعة ( فوفو عبد الفتاح ) – ولا يالمونة هو إسمها صح كدة ولا الكلام تاة منى – التعميرة دى جامدة قوى يا صبحى .
– صبحى مين ياعم – إنت مين !
– أنا فاروق يا سديكى .
– يا جماعة الواد راح فى سكة تانيه خالص .
– بقى ياراجل تسيب الكنوات دى كلها وتتفرج على فوفو عبد الفتاح .
– ومالها فوفو دى ولية وتد كانت زمان بتهز الدنيا على واحدة ونص وبترقص وهى قاعدة وهى واقفة وهى نايمة وبتقول نشرة الأخبار وبتعمل لكاءات مع فنانين وسياسيين وخبرا هو إنت تطول .
– دى إمبارح كدمت برنامج طبخ والنهاردة إشتركت مع مذيع كبير وعملوا برنامج شارع عبد التواب – وكدمت مع الفنانة الكبيرة شاليمو مهرجان الهيافة وبرنامج طبى إسمة شد ونفخ ومسابقة كل يوم بواخة .
– تعرف يا حمو أنا شوفت النهاردة الواد دة أبو وسط أستيك بيرقص ولا أجدع رقاصة بيّرعش لاموأخذة الحتة اللى ورا وبيغنى للعنب والحمار وبيقول أوعى وبيتنطط زى القرد – أنا إستغربت خالص وكنت فاكر إن الصنف اللى كان فى الحجر مضروب وكنت هاضرب الواد عنتيرة بالجوزة بصراحة الواد مزجنجى خالص – كيفنى متقولش عُبّدّ بتاع أبى فوق الشجرة – إلا قولى ياعباس هوطلع فوق الشجرة إزاى ؟ مين اللى رفعة – الأستاذ بتاع الفيلم ماقلش إزاى طلع وإمتى نزل .
– بص شحتة لعباس وقالة المعلم وصل والمسائل قفّلت معاة جهّز له التكويعة لحسن دا ضرب خالص .
الجوزة بقت حجر داير على الكل وتقريبا المجلس كلة بقى فى الطرابوتشى خالص مفيش حد بقى هنا كلهم زى ما بيقولوا هناك وأحلى كلام تسمعة من الحشاشين – وأحيانا تسمع الكلمة ناقصة والجملة عايمة وممكن ما يكملش الواحد منهم الجملة لو حب يتفزلك .
– متفك ياجدع اللفتين اللى إحنا شارينهم زمان الكباب والكفتة بردوا – هو إحنا جايبينهم نتصور معاهم – وزع يا معلم على الرجالة خليهم يتعشوا – أنا سمعت مرة إن الكيف قصدى الحشيش بيجّوع – ياعم إحدفلى حتتين طرب علشان أشغل المسائل .
التليفزيون المصرى فى نشرة الأخبار – أكد مصدر مسئول بوزارة الداخلية أن الوزارة قد قامت أمس الأول بشن حملات أمنية إستطاعت بمقتضداها القضاء على جميع أوكار تجار المخدرات والوزارة بصدد تمشيط جيوب الإتجار فى المخدرات للقضاء عليها .
بص شحتة ودماغة مش قادر يرفعها – الله الكلام باين عليه بجد المرة دى – بس يافتحى كل ما نسمع الكلام دة التسعيرة بتزيد – إنت تعرف يا سديكى إن القرش فى الكلمتين دول زاد عشرين لحلوح .
– رد عليه فتحى وهو يحاول الوقوف بصعوبة – هو مش المفروض يا أسطى يوزعوا الكيف مع التموين – مش وزارة التموين لازم تراعى وصول الكيف لمستحقية .
– رد سيدهم وهو ضارب تكويعة على الأرض – واحد صاحبى بيقول لى إنهم عاملين وزارة للسعادة ، والوزارة دى مخلية الناس مدلعة – عايز إنبساط تلاقى – عايز فرفشة تلاقى – عايز ونونة تلاقى – دول بيوزعوا الفياجرا مجانا مع التأمين الصحى .
– صحيح يا صبحى مش المفروض يوزعوا فرق النقط بتاع العيش كل شهر مخدرات تكيف البشر – ولا الكلام مش مظبوط .
– صبحى مين ياجدع اللى إنت بتتكلم معاة من الصبح .
سيد عبد النبى محمد
