قصيدة ( الرسالة )
بالمسرحية البطلة ماتت
قبل ما يحين الفينال
قبل ما توصّل رسالة
تبقي مغزاها انحلال
بالكالوس كومبارس باكي
قلبه عشمان بالحلال
المسرحية حكاية بايخة
بس محبوكة بضمير
هيه قصة زي قصة
وبرده متعاده كتير
والقصة مسرح له رئيس
والمشاهد ديه معاده
واللي محكي من زمان
كله كوم والجاي حمادة
فصل اول بنت حلوة
مسلطين فوق راسها ضوء
اقصي اليسار شيخ بعمه
بيبتدي لسه الوضوء
وفي اليمين الحفلة دايرة
واتنصب ليها اجتماع
وافتتح تصويت بسيط
الكل اجمع بالموافقة
الا واحد بس منهم
رده كان ب الامتناع
والبنت جريت واختفت
كنجمة غطاها الضباب
و الشيخ بيدعي ربنا
يارب نجي من الخراب
فصل تاني فوضي عارمة
وناس بتجري من الحرس
والحرس عميان يا عمي
زي بغل معلقين فوقه الجرس
وادي ساقية دايرة لحد بكره
بس مين يفهم وبرده مين فَرس
قبل موت البطلة بثواني ظهر
كومبارس دوره بس يتغني بعود
وبطرف عينه بصلها في عنيها
يا هل تري حبي بقلبك له وجود
خرج الولد بره الاطار
دق الناقوس انذر كابوس
طلق البنادق فات كسر
……. كسر الفانوس
واتدلت الشمعة اللي قايده
والبنت مرمية بتوبها
…… اللي اتستر
بشباب هتافهم عدي
….. من قلب انفطر
ظهر الحرس صوت البنادق
……. صوت خطر
صاب الشباب الطلق
واخترق البدن
طال البِناية في قلبها
والسوس نخر
والسوس مكمل سكته
بعضم السفن
والمركب اللي لسه
راسي من مفيش
اصبح نهايته زي غيره
….. هيندفن
بالمسرحية البطلة ماتت
قبل ما يحين الفينال
قبل ما توّصل رسالة
تبقي مغزاها انحلال
والرسالة واصله واصله
بالقصيدة و بالمقال
او بغنوة هايفه
طالعة بلسان العيال
بقلم/ شاعر بلاد النيل
شاعرالنيل_والفرات
احمد حلمي
