ليه بتكتبي شعر؟
قالتلي عشان احيا
علا منسوب الدمع وفاض
من كل ناحية
وطيفها مالي المكان
رغم الفراق الأبدي
لأن العيون بتغفي
والذكرى دايما صاحية
===
وانا كنت ماضي مُبهم
وأصبحت حاضر واعي
بقيت ضمير مُتمرد
على الروتين بتاعي
دانا اكتشفت نفسي
لما ارتويت منكِ
دانا في حفل وداعك
كنت المدعو والداعي
===
ودلوقت انا هاكتب زيك
وهايحضن الورق مشاعري
وهاوصف ملامحك بروحي
وروحك هتبان في شعري
وهافني عمري اللي باقي
وانا باكتب ل “بنتي”
وهامضي بضمير مستتر
تقديره “انتِ”
+من ديوان الفترينة
