( ضحكة الشهيد)
مستغربين ليه من
ضحكتي
أنا شايف مكانى فى جنتي
مت راجل ياما بلغوكِ
أكيد بكلامهم ياما صبروكِ
أطمني ياما هجيلك
فى منامك هاجي وأحكيلك
عن جنة كانت متحضرة
عاملة حسابها ومتخضرة
عارفة ياما شفت مين
كل زمايلي المجندين
فى حفل كبير وفرحنين
أنا فرحي ياما هيكون هنا
وسط ملايكة مخصوص لنا
كنت فاكر ذنوبى كتير
شفتها قدامي بتطير
أتغفرت ياما كلها
مش كنتي شايلة همها
كأنها ملح وفى بحر داب
وقالوا أدخل من غير حساب
كنت فاكر اليوم دة بعيد
وكنت ناوى أصلى والله بعد العيد
قولى لأخويا الموت ملوش مواعيد
وأن العمر لو راح مش ممكن يعيد
وإللى قتلوني ياما موجودين
بس على راسهم شوك وطين
فاكرين الجنة للجبارين
وهى ياما للموعودين
قتلوني وهما بيكبروا
فاكر قتلى هيطهروا
يشوف مين على النار يصبروا
أنا كنت بحمي أهلى وناسي
وكنت جانبي ولا أنت ناسي
خطفوك وقالولك أية عني
خلاك تكرهنى وتلعني
فات أوان اللوم وخلاص
وجة وقت حساب الغدر والإخلاص
(نوال غريب )
