رسالة إلى زوجي في الغربة
كلمات وإلقاء : الأستاذة نوال غريب
إعداد الفيديو : الأستاذة نهاد كراره
الغربة يعنى أنت بعيد
تشوف أولادك بمواعيد
ولا تعرف مين نجح
ولا مين بيعيد
والفجوه بينكم تكبر
وتزيد
مش مهم تنزل بهدايا فى العيد
ده صوتك وأنت وسطنا تغريد
طبعا ده قرار صعب
وأحلاهم مر
والعمر والسنين بتجرى وبتمر
وموازنة بين نفوس
وفلوس تغر
تسألنى أقولك ده قرارك
وأنت حر
وناس عايزة الخير
وكتير بيقُرّ
وتقولى دى سنه
والسنين تكر
وأولادك يكبروا بعيد عنك أغراب
تشوفهم فى أحلامك وحواليك سراب
وتتمنى تمسك ولو حبة تراب
من وطن فية الأهل والأصحاب
وفجأة تلاقى شبابك منك أتسرق
وحطيت مكانه فى البنك ورق
والعزيز والغالى عنك أفترق
تاخد عزاهم من بعيد
وقلبك أتحرق
وتبدأ تعيش فى عمر الستين
وطبيبك يمنعك من أكل البروتين
وتبعد عن السكر وأكل السمين
وطبعا عن الملح وعيش الطحين
ويفضل السؤال بين نفوس وفلوس
أصحى وفوق من أكبر كابوس
أمسك أولادك وأحضنهم وبوس
هما دول ثروتك والكنز المحبوس
