هدية السنة الجديدة
مستنى كتير
و صبرت كتير انا ع الدنيا
ولا عدى الفرح عليا ف يوم
ولا شفت سعادة ولو ثانيه
و كأنى ف دايرة بَدَور فيها على الأركان
و كأن الحب دا زائر ليل
بيزورنى و أول كان ياما كان
بيصيح الديك
تخلص حكاياته و أناته
ولا يفضل منهم شىء يديك
طب ايه موديك
او ايه جابك
دا مافيش ولا حتى حبيب .. سابك
ولا حتى مغامرة على الفاضى
هتموت كدا قلبك مش راضى
للدرجادى
كان فاضل ركن اخير ف العمر
مش مدهون وشين م الأسود
كان فاضل لسه يدوبك عمر
لما لمحت الشعر الأسود
بيزين أجملها صبية
وساعتها عرفت أن الدنيا
كانت شايلالى ف حصلتى
أحلى هدية
طب مين هى
و ازاى ف عنيها بشوف العيد
وبشوف الكورنيش وقت الصيف
وبشوف عشاق تدى المواعيد
ولا تتأخر حتى دقايق
وبشوف كوبرى أكتوبر رايق
وبشوف صياد من بحرى هناك
مستنى الرزق بصبر جميل
و يهل الليل ولا مضايق
وبشوف كيوبيد بيقولى أوعاك
وبشوف شباك
طالل على جنة أرضية
وبشوف ثومة تقول أغنية
أغنية إيه .. أنا بستناك
واتارى الصبر جميل يا ولاد
واهو باين هانت اهيه خالص
حزنى راح المله كل الزاد
و اطرده من دنيتى دى خالص
يالا بناقص
علشان انا هبدأ ع الهادى
الحلوة اهى واقفه اهى قصادى
وهفاجىء قلبى اللى تملى
كان ف الترتيب فردى أحادى
يا رحلة عرفت مرساها
بتوب ف عنيها عن ذنبى
كل الحاجات أنا بقدر أنساها
إلا أنتى واشمة الاسم على قلبى
