الحقوا أطفالنا من النت أن كان واد ولا بت
نصحتى دى لكل ست
من كتر ما عليكى من هم عايزه أولادك تهدا وتتلم
ويبعدوا عن الخناقات والغم
تروحى لهياهم فى المجهول
وكأنك رمتيهم للغول
ويصبح أدمان ومافيش حلول
وبعد ما تكتشفي الجريمه
يكون سرقهم أبن الائيمة
ويصبح كلامك مالوش قيمة
تهاتى ما تهاتى وتقومى وتباتى
أنا جبت حرامى فى البيت لولادى
أسمعى وركزى معايا فى الأتى
هنتعب على بال ما ينسحب من جسمهم
ده أكتر من الأفاعى والعقارب فى سمهم
بس هنركز على مصادر حبهم
كأنك دخلتيهم مصحة للعلاج
ونحط المريض وحوالية سياج
نلاهي ونشغلة مهما هاج
ونخفى طبعا أسباب الأدمان
وطبعا هيشعر بالملل والحرمان
أوعى تضعفى حتى لو عمل عيان
التليفون فاصل والشاحن أختفى
والحجج كتير لحد ما أكتفى
وهزرى وأضربي على الكتف والقفى
وأبعدى عن الوجه والأهانة
والله عارفة أنك مهدودة و تعبانة
ومن كتر تكرار الكلام زهقانة
والعيال يفقدوا الأعصاب وزنانة
بس نفذى وأصبورى وأنتى الكسبانة
(نوال غريب)
