ولاء الدين فاروق
الحصالة
يضيع كل اللى حوشته
ف غمضة عين
وتفضل دمعتين ع الخد
وليه فاضلين
ما كنتو تروحو بالمره
مع الرايحين
هيفضل مين
ومين باقى
تَلاهى الدنيا و تَلاقى
ولو عطشان رضا و سرور
ِتلاقى مين يبل الريق
ومين ساقى
سؤال عن ناس .. يجر سؤال
بتتغير كتير أحوال
وفيهم سكة لذنوبك
قُليل كان عالخير دال
يا حرف الدال
ما تيجى الجانب (الايمن)
فى طرف الفرح لو امكن
تمد ايديك لـ بنى ادم
يحس سعادة كدا ( دايما )
وايه دايم ف كل الدنيا دى اصلا
انا تايه
عنيا ضلت الاحلام
تبان للكل مفتوحه
وتيجى على الطموح و تنام
لسانى يقضى أيامه بـ أى كلام
بلا أهداف
بخاف لما النهار يطلع
ويجى الليل فـ برضو بخاف
ولا عندى حلول كامله
ولا أَنصاف
ومش إنصاف
يروح كل اللى كان موجود
وتفضل لى الدموع صاحب
واهلا بيها يا مراحب
كضيف فى بعض الاوقات
لكن كالضل تلازمنى
يا خلق انا برضو لازمنى
يكون الهَم مش مهتم
يسيبنى حتى لو فاصل
– ياريت ما يعود-
ولما بس اخد نفسى
واعمل بس إستعداد
نرتب بيننا مره ميعاد
نصفى فيه حساباتنا
و لو مديون
هسدد كل أحزانى
ولو كنت أنا الجانى
عقوبتى اخدتها و فاضت
ومستنى يدوب فرصة
احوش فرح من تانى
ولاء _الدين_فاروق
